Jaan Di Kis Ke Liye Hum Ye Bataen Kis Ko

Akhtar Saeed Khan

jaan di kis ke liye ham ye bata.en kis ko

kaun kya bhuul gaya yaad dila.en kis ko

jurm ki tarah mohabbat ko chhupa rakkha hai

ham gunahgar nahin hain ye bata.en kis ko

ruuTh jaate to manana koi dushvar na tha

vo ta.alluq hi na rakkhen to mana.en kis ko

kaun deta hai yahan ḳhvab-e-junun ki ta.abir

ḳhvab ham apne suna.en to suna.en kis ko

koi pursan-e-vafa hai na pashiman-e-jafa

zaḳhm ham apne dikha.en to dikha.en kis ko

chak-e-dil chak-e-gareban to nahin ham-nafaso

ham ye tasvir sar-e-bazm dikha.en kis ko

kaun is shahar men sunta hai fughan-e-durvesh

apni ashufta-bayani se rula.en kis ko

ho gaya ḳhaak rah-e-ku-e-malamat ‘aḳhtar’

raah par laa.en jo ahbab to laa.en kis ko