dam-e-visal ye hasrat rahi rahi na rahi
jamal-e-yar ki hairat rahi rahi na rahi
use ye naaz tha ḳhud par ki zindagi hai miri
so zindagi ki haqiqat rahi rahi na rahi
kamal kar ke dikhaya hai meri ankhon ne
ab in men pahli si vahshat rahi rahi na rahi
laga hua hai zamana isi tajassus men
vo mere pahlu ki zinat rahi rahi na rahi
koi bhi rabt magar da.imi nahin hota
kisi ke haq men tabi.at rahi rahi na rahi
hazaron yaar hazaron hi chahne vaale
magar nasib men ḳhalvat rahi rahi na rahi
hai kaisa zor ka tufan bachen bachen na bachen
rahi rahi na rahi chhat rahi rahi na rahi
yuun apne jazb men gum ho gaya hai ab ‘sani’
sharab-o-mai ki zarurat rahi rahi na rahi
Leave a Reply