faiz-ahmad-faiz

Ai Dil-E-Betab Thahar

tirgi hai ki unmaDti hi chali aati hai

shab ki rag rag se lahu phuut raha ho jaise

chal rahi hai kuchh is andaz se nabz-e-hasti

donon aalam ka nasha tuut raha ho jaise

raat ka garm lahu aur bhi bah jaane do

yahi tariki to hai ghaza-e-rukhsar-e-sahar

subh hone hi ko hai ai dil-e-betab thahar

abhi zanjir chhanakti hai pas-e-parda-e-saz

mutlaq-ul-hukm hai shiraza-e-asbab abhi

saghar-e-nab men aansu bhi Dhalak jaate hain

laghzish-e-pa men hai pabandIi-e-adab abhi

apne divanon ko divana to ban lene do

apne mai-khanon ko mai-khana to ban lene do

jald ye satvat-e-asbab bhi uth jaegi

ye giran-bari-e-adab bhi uth jaegi

khvah zanjir chhanakti hi chhanakti hi rahe

More Poems

Leave a Comment