main ḳhud hi ḳhvab-e-ishq ki ta.abir ho gaya
goya har ik bashar tiri tasvir ho gaya
apne kiye ko aa ke zara dekh tir-gar
tar ḳhun-e-dil se daman-e-naḳhchir ho gaya
phir pesh aa gaya vahi dilchasp hadisa
dil phir kisi ke daam men tasḳhir ho gaya
ye vaz-e-ashiqan ye andaz-e-ehtiram
aḳhir mira ḳhayal use dil-gir ho gaya
asudgi nasib salimuttaba huun main
mujh ko gharib-ḳhana hi kashmir ho gaya
vabasta mujh se hona hai ḳhud vaj.h-e-afiyat
divana tera vali-e-taqdir ho gaya
tafrid ḳhud zariya-e-jah-o-jalal hai
main tera ho ke sahab-e-tauqir ho gaya
to ḳhuub janta hai ki main kaun tha kabhi
aur dekh ab ki kya falak-e-pir ho gaya
hona tha hashr-e-hasrat-o-hirman agar yahi
‘rahbar’ zah-e-nasib ki tu piir ho gaya
Leave a Reply