Jab Bhi Dil Khol Ke Roe Honge

jab bhi dil khol ke roe honge

log aram se soe honge

baaz auqat ba-majburi-e-dil

ham to kya aap bhi roe honge

sub.h tak dast-e-saba ne kya kya

phuul kanton men piroe honge

vo safine jinhen tufan na mile

na-ḳhudaon ne Duboe honge

raat bhar hanste hue taron ne

un ke aariz bhi bhigoe honge

kya ajab hai vo mile bhi hon ‘faraz’

ham kisi dhyan men khoe honge

Leave a Comment