roz ḳhvabon men na.e rang bhara karta tha
kaun tha jo miri ankhon men raha karta tha
ungliyan kaaT ke vo apne lahu se aksar
phuul patton pe mira naam likha karta tha
kaisa qatil tha jo hathon men liye tha ḳhanjar
chupke chupke mire jiine ki dua karta tha
haa.e qismat ki yahi chhoḌ ke jaane vaala
umr bhar saath nibahenge kaha karta tha
phuul sa jism sulagte hue sandal ki tarah
dil ke mandir men sar-e-sham jala karta tha
vo jo ik lamha kisi yaad men kaTta tha ‘nazir’
dil ke jalte hue sho.alon ko hava karta tha
Leave a Reply