Bekhud Dehlvi
jata.e jaate hain ehsan bhi sata ke mujhe
sikha rahe hain vo goya chalan vafa ke mujhe
rakha na ham ko kahin ka tiri mohabbat ne
vo kah rahe hain adu se suna suna ke mujhe
tamiz-e-ishq-o-havas peshtar na thi un ko
vo aur ho ga.e maghrur aazma ke mujhe
shab-e-visal ada.en bhi hain jafa.en bhi
dikha.e jaate hain andaz kis bala ke mujhe
jo sair dekhni manzur hai tumhen ‘beḳhud’
bhiḌa do hazrat-e-zahid se mai pila ke mujhe
Leave a Reply