Syed Shakeel Desnavi
kis ko ḳhabar ye hasti kya hai kitni haqiqat kitna ḳhvab
dasht-e-fana men hairan hain sab le kar apna apna ḳhvab
lipTi hui thi ham se kaisi ḳhushbu us ki yadon ki
aankh khuli tab jaana ham ne dekha tha ik pyara ḳhvab
us ke tasavvur men qurbat ke dhoke kitne khaa.e hain
paas jo aa.e aisa lage hai aadhi haqiqat puura ḳhvab
kho kar us ko yuun lagta hai jaise sab kuchh haar ga.e
ashkon se ham joḌ rahe hain apna bikhra bikhra ḳhvab
dukh to yahi hai in baton se tum kitne anjan rahe
dil men basa kar tum ko ham ne dekha kaisa kaisa ḳhvab
dekh ke is ko jaane aisi ‘sayyad’ ji kya baat hui
ankhon ki dahliz pe ham ne pyaar bhara ik rakkha ḳhvab
Leave a Reply