shahnaz-parveen-shazi

Agni Pariksha

khuli hava aur ghutan ke vaqfe

tavil tar the to phir bhi itne garan nahin the

magar guzishta kai dinon se ye vaqfe goya simat chuke hain

abhi main ji bhar ke le na paati huun chand sansen hasin faza men

ki phir usi vaqfa-e-ghutan ki saqil dastak

samaaton ko figar karti

payam laati hai mausam-e-habs aur ghutan ke

main is tasalsul se thak chuki huun

ai lam-yazal ai khuda-e-bartar

ye darmiyan ki aziyyaton ko mita ke kar de

mire muqaddar men mausam-e-gul hameshgi ka

vagarna phir daimi habs bakht kar de

More Poems

Leave a Comment