mujh pe har zulm rava rakh ki main jo huun so huun
mujh ko apne se juda rakh ki main jo huun so huun
main ki maslub huun de mujh ko bhi zalim ka ḳhitab
sunnat-e-isa jila rakh ki main jo huun so huun
mere ghar men hai jo ghasib to nikalun ki nahin
mujh pe ilzam-e-jafa rakh ki main jo huun so huun
tere maqtul pe sargarm hain saare munsif
meri lashon ko uTha rakh ki main jo huun so huun
garm aahon pe hai ilzam ki huun sho.ala-nafas
mujh ko phunkon se bujha rakh ki main jo huun so huun
kyuun sahifon men likha hai ki milega insaf
lafz-o-mani na juda rakh ki main jo huun so huun
teri zambil men har chaal purani hai raqib
mujh ko apnon se laḌa rakh ki main jo huun so huun
apne virse se tira qabza haTana hai haris
naam dahshat ki bala rakh ki main jo huun so huun
main ne ankhon men jala rakha hai azadi ka tel
mat andheron se Dara rakh ki main jo huun so huun
gar mira haq na milega to bigaḌ ja.egi baat
apne pahlu se laga rakh ki main jo huun so huun
karbala rakh ke hatheli pe chala huun ghar se
bai.at-e-zulm haTa rakh ki main jo huun so huun
jab zaminon men jaḌen hain to kidhar ja.unga
meri shaḳhen na kaTa rakh ki main jo huun so huun
adl ki miTTi men ugte nahin dahshat ke babul
apni miTTi ko safa rakh ki main jo huun so huun
band ankhon se siyah-ru nazar aa.ega ‘anis’
chashm-e-bina ko khula rakh ki main jo huun so huun
Leave a Reply