Aziz Hamid Madni
vo saa.at surat-e-chaqmaq jis se lau nikalti hai
talash-e-admi ke zaviye kya kya badalti hai
kabhi ik lau se shashdar hai kabhi ik zau se hairan hai
zamin kis inkishaf-e-nar se yarab pighalti hai
taghayyur ki sadi hai atishin ḳhvabon ki paikaren
rasad-gahon ke a.inon men ik ta.abir Dhalti hai
nazar ko ik ufuq taza-e-ruḳhi se teri milta hai
vafa us fasle ka raaz pa kar ḳhud sambhalti hai
nigah-e-naz sab ramz-e-mohabbat kah ga.i aḳhir
ḳhirad ki parda-dari kya kaf-e-afsos malti hai
lahu men aap jal uThti hai koi sham-e-ḳhalvat si
visal-andaz us ke ḳhvab men jab raat Dhalti hai
rivayat ki qanaten jis hava se jalne vaali hain
savad-e-asia men vo hava ab tez chalti hai
varaq ik dhund ka taaza taghayyur jab ulaTta hai
tarashida ruḳh-e-almas si ik lau nikalti hai
Leave a Reply