Tu Mujhko Sun Raha Hai to Sunai Kyun Nahin Deta

Manish Shukla

tu mujh ko sun raha hai to suna.i kyuun nahin deta

ye kuchh ilzam hain mere safa.i kyuun nahin deta

mire hanste hue lahje se dhoka kha rahe ho tum

mira utra hua chehra dikha.i kyuun nahin deta

nazar-andaz kar rakkha hai duniya ne tujhe kab se

kisi din apne hone ki duha.i kyuun nahin deta

main tujh ko dekhne se kis liye mahrum rahta huun

ata karta hai jab nazren rasa.i kyuun nahin deta

ka.i lamhe chura kar rakh liye tu alag mujh se

tu mujh ko zindagi-bhar ki kama.i kyuun nahin deta

ḳhud apne-ap ko hi gher kar baiTha hai tu kab se

ab apne-ap se ḳhud ko riha.i kyuun nahin deta

main tujh ko jiit jaane ki mubarakbad deta huun

tu mujh ko haar jaane ki badha.i kyuun nahin deta