Jameel Yusuf
hua chali to nasha chha gaya fazaon men
ḳhayal Duub gaya duur ki sadaon men
na haath aa.e mire dauḌte hue lamhe
safar kaTa hai mira badalon ki chhanv men
men apne shahr ke naqsh-o-nigar bhuul gaya
kisi ne luuT liya mujh ko chaaT gaanv men
na ishq ki koi manzil na husn ka koi taur
ye aag kaise giraftar ho vafaon men
ye faslon ke sarabon se sair ho na sake
na jaane tishnagi kitni hai mere paanv men
qadam qadam pe mujhe sajda-gah nazar aa.e
ghira hua huun main bandon men ya ḳhudaon men
ise bhi gahe-ba-gahe nigah men rakhna
‘jamil’ bhi to hai tere ghazal-saraon men
Leave a Reply