ahmad-nadeem-qasmi

Marun To Main Kisi Chehre Mein Rang Bhar Jaun

marun to main kisi chehre men rang bhar jaun

‘nadim’ kaash yahi ek kaam kar jaun

ye dasht-e-tark-e-mohabbat ye tere qurb ki pyaas

jo izn ho to tiri yaad se guzar jaun

mira vajud miri ruuh ko pukarta hai

tiri taraf bhi chalun to thahar thahar jaun

tire jamal ka partav hai sab hasinon par

kahan kahan tujhe DhunDun kidhar kidhar jaun

main zinda tha ki tira intizar khatm na ho

jo tu mila hai to ab sochta huun mar jaun

tire siva koi shaista-vafa bhi to ho

main tere dar se jo uthun to kis ke ghar jaun

ye sochta huun ki main but-parast kyuun na hua

tujhe qarib jo paun to khud se Dar jaun

kisi chaman men bas is khauf se guzar na hua

kisi kali pe na bhule se paanv dhar jaun

ye ji men aati hai takhliq-e-fan ke lamhon men

ki khuun ban ke rag-e-sang men utar jaun

More Poems

Leave a Comment