Akhtar Ansari Akbarabadi
na raz-e-ibtida samjho na raz-e-intiha samjho
nazar valon tumhen karna hai ab duniya men kya samjho
talab men sidq hai to ek din manzil pe pahunchoge
qadam aage baḌhao ḳhud ko apna rahnuma samjho
ye kya andaz hai itna gurez ahl-e-tamanna se
ḳhuda taufiq de to ahl-e-dil ka mudda.a samjho
tumhare har ishare par sar-e-taslim ḳham lekin
guzarish hai ki jazbat-e-mohabbat ko zara samjho
ho koi mauj-e-tufan ya hava-e-tund ka jhonka
jo pahuncha de lab-e-sahil usi ko naḳhuda samjho
jise dekho vahi badmast hi maghrur hai hamdam
koi banda nahin duniya men kis kis ko ḳhuda samjho
yahan rahbar ke parde men bahut rahzan hain ai ‘aḳhtar’
raho duur us se tum jis ko vafa na-ashna samjho
Leave a Reply