Shariq Kaifi
udaas hain sab pata nahin ghar men kya hua hai
hamara itna ḳhayal kyuun rakkha ja raha hai
kuchh itna ḳhush-fahm ho gaya huun ki apna chehra
para.i ankhon se jab bhi dekha bura laga hai
abhi to achchhi lagegi kuchh din juda.i ki rut
abhi hamare liye ye sab kuchh naya naya hai
ḳhushi hui thi ki ab main tanha nahin huun lekin
ye shaḳhs to mere saath chalta hi ja raha hai
mujhe to is baat ki ḳhushi hai ki ab bhi mujh men
kisi pe bhi e’tibar karne ka hausla hai
Leave a Reply