Kai Jalwe Teri Pahchan Ke Dhoke Se Nikle Hain

ka.ī jalve tirī pahchān ke dhoke se nikle haiñ

siyāsat saiñkaḌoñ chehre tire chehre se nikle haiñ

hamāre daur ke bachche sabaq paḌhte haiñ chāhat kā

kitāboñ ke bajā.e dil har ik baste se nikle haiñ

har ik bhaa.ī kī ḳhvāhish hai ki baTvārā ho ab ghar kā

abhī ham mulk kī taqsīm ke sadme se nikle haiñ

idhar dekho yahāñ maañ hai udhar hai baap bachchoñ kā

zamāne bhar ke sab rishte isī rishte se nikle haiñ

rasan tak koī jaatā hai koī maqtal talak ‘hāfiz’

jo raste husn vāloñ ke hasīñ kūche se nikle haiñ

Leave a Comment