ham apne baḳht-e-siyah ke asar men rahte hain
vo raat hai ki sitare nazar men rahte hain
tamasha-e-gah-e-tulu-o-ghurub se haT kar
ham ik savad-e-shab-e-be-sahar men rahte hain
na thi ḳhuda ki zamin tang jin ke qadmon par
fughan ki qaid vo divar-o-dar men rahte hain
vo agahi ke samundar kahan hain jin ke liye
tamam-umr ye pyase safar men rahte hain
hava-e-kucha-e-mahbub se kahe to kaun
ki ham bhi arzu-e-nama-bar men rahte hain
vo shahryar-e-suḳhan naam jin ka ‘sahba’ hai
faqir ban ke tiri rahguzar men rahte hain
Leave a Reply