Poet
apni qismat men agar aish ke saman hote
ain mumkin tha ki ham aur pareshan hote
baghban naaz na kar apne chaman-zaron par
ham ne dekhe hain chaman-zar bayaban hote
aur hi Dhang se tanzim-e-gulistan hoti
dur-andesh agar ahl-e-gulistan hote
yahi duniya jo jahannum hai vo jannat hoti
apne kirdar se insan agar insan hote
shaḳh-e-nazuk pe khule hi the ki murjha bhi ga.e
ek din phuul yahi shan-e-baharan hote
apne hi ghar ki kisi shai pe nahin haq apna
is se behtar tha ki ham be-sar-o-saman hote
ham ne har jaur saha un ka ḳhushi se lekin
kaash vo apni jafaon pe pasheman hote
koi ḳhubi na koi vasf na koi jauhar
ham agar hote to kis baat pe nazan hote
tab.a mauzun men agar zor-e-bayan bhi hota
ham bhi auron ki tarah sho.ala-ba-daman hote
ai ‘kanval’ pa-e-talab hi men thi laghzish varna
marhale jo bhi the is raah men asan hote
Leave a Reply