Jashn Tha Aish-O-Tarab Ki Intiha Thi Main Na Tha

jashn tha aish-o-tarab ki intiha thi main na tha

yaar ke pahlu men khali meri ja thi main na tha

us ne kab barkhast ai dil mahfil-e-mearaj ki

kis se puchhun raat kam thi ya sava thi men na tha

main tadap kar mar gaya dekha na us ne jhank kar

us sitamgar ko aziiz apni haya thi main na tha

vaada le leta ki khilvana na mujh ko thokaren

alam-e-arvah men jis ja qaza thi main na tha

sarf karta kis khushi se ja ke us men apni khaak

kya kahun jis din banai karbala thi main na tha

munh na khul sakta na hote ham-kalam un se kalim

umr bhar hasrat hi rahti baat kya thi main na tha

le gai thi mujh ko hasrat janib-e-khud-raftagi

jis taraf ko manzil-e-bim-o-raja thi main na tha

dil ulat jaata mira ya dam nikal jaata mira

shukr hai jab lan-tarani ki sada thi main na tha

lala-o-gul ko bacha leta khizan se ai ‘sharaf’

baagh men jis vaqt nazil ye bala thi main na tha

Leave a Comment