Sufi
muḳhalif andhiyon men azm ke dipak jalata huun
kabhi jab vaqt paḌta hai to ḳhud ko azmata huun
main shahzada hava ka huun ḳhala meri riyasat hai
kabhi main uḌte uḌte asman ko phand jaata huun
kabhi main ret hi se khelta rahta huun bachchon sa
kabhi main zaat ke gahre samundar men nahata huun
kabhi be-ḳhud paḌa rahta huun main parda-nashin ho kar
kabhi fitrat ke ik ik raaz se parde uThata huun
kabhi ehsas ka ik ḳhaar chubh jaae to ro uTThun
kabhi main daar ke taḳhte pe chaḌh kar muskurata huun
kabhi main rote rote hans diya karta huun pagal sa
kabhi main hanste hanste ansuon se bhiig jaata huun
kabhi main be-his-o-harakat paḌa rahta huun pahron tak
kabhi main zindagi ke saaz par naghme sunata huun
kabhi zarḳhez dharti ko bhi ḳhatir men nahin laata
kabhi banjar zamin men aas ke paude lagata huun
main ik qatra huun lekin ab samundar ban gaya samho
main ik naddi se mil kar su-e-manzil bhaga jaata huun
miri fitrat ajab hai aaj tak main bhi nahin samjha
vo jin ke par nahin hote unhen uḌna sikhata huun
main gahre paniyon ko chiir deta huun magar ‘hasrat’
jahan paani bahut kam ho vahan main duub jaata huun
Leave a Reply