Dinesh Kumar Drouna
yuun vahshat-e-junun se bachaya gaya mujhe
ḳhalvat se duur bhiiḌ men laaya gaya mujhe
chashma haTa ke shahar ghumaya gaya mujhe
jo tha nahin vo sab bhi dikhaya gaya mujhe
main tha buzurg peḌ sa angan ke biich men
so dekhta gaya jo dikhaya gaya mujhe
ik hadse men jal ke miri maut ho ga.i
main jal chuka tha phir bhi jalaya gaya mujhe
maqsad tha un ka luTna mujh ko jue men so
pahle-pahal to yunhi jataya gaya mujhe
main tha charagh aur mira me.aar dekhne
suraj ki raushni men jalaya gaya mujhe
Leave a Reply