ab aap kah rahe hain ki chehra udaas hai
main ne suna tha aap ka kamra udaas hai
gardan hai ḳhud-kushi ke bahane talashti
har roz mujh se kahti hai pankha udaas hai
barish men bhigti hui laḌki ko kya ḳhabar
fōtpath par paḌa hua chhata udaas hai
koi na dekh paaya to bola nahin koi
gunga hai bad-guman to andha udaas hai
paTri pe leT ja.unga sarvat nahin huun main
par janta huun rail ka pahiya udaas hai
bargad ki shaḳh toḌ di andhi ne pichhli raat
is vaste to gaanv ka buḌha udaas hai
Leave a Reply