a.ine se parda kar ke dekha jaa.e
ḳhud ko itna tanha kar ke dekha jaa.e
ham bhi to dekhen ham kitne sachche hain
ḳhud se bhi ik va.ada kar ke dekha jaa.e
divaron ko chhoTa karna mushkil hai
apne qad ko uncha kar ke dekha jaa.e
raton men ik suraj bhi dikh ja.ega
har manzar ko ulTa kar ke dekha jaa.e
dariya ne bhi tarsaya hai pyason ko
dariya ko bhi pyasa kar ke dekha jaa.e
ab ankhon se aur na dekha ja.ega
ab ankhon ko andha kar ke dekha jaa.e
ye sapne to bilkul sachche lagte hain
in sapnon ko sachcha kar ke dekha jaa.e
ghar se nikal kar jaata huun main roz kahan
ik din apna pichha kar ke dekha jaa.e
Leave a Reply