Dil Ko Latka Liya Hai Gesu Mein

dil ko latka liya hai gesu men

jab vo baithen hain aa ke pahlu men

DabDabate hi ankhen pathrai

kya hi hasrat bhari thi aansu men

sar-kashi ki jo bu-e-gesu ne

chhup raha mushk naf-e-ahu men

zindagi bhar karenge us ki talash

chal basenge isi takabu men

dard-e-dil ruui se na sekvana

aag hai is taraf ke pahlu men

kaun kahta hai khal-e-mushkin hai

dil hai kisra ka taq-e-abru men

bazm men un ki jab gae hain ham

itr bhar bhar diya hai chullu men

bulbulon men hamara dil hoga

ruuh hogi gulon ki khushbu men

dil to tha ikhtiyar se bahar

ab jigar bhi nahin hai qaabu men

bahr-e-gham men marenge Duub ke ham

qabr ik din banegi taapu men

khuun rulati hain ankhdiyan teri

ek hi hain ye donon jaadu men

huren passang ki karengi havas

mil vo baithenge jis tarazu men

kis ko ghash aa gaya jo chidkoge

kyuun bhara hai gulab chullu men

alam-e-vajd dil ko rahta hai

mast hain naara-ha-e-yahu men

ai ‘sharaf’ jab maza hai rone ka

niklen lakht-e-jigar bhi aansu men

Leave a Comment