suḳhan ki dilkashi soz-e-dili lagti nahin mujh ko
ye laffazi to ji ki bekali lagti nahin mujh ko
ye sach hai quvvat-e-tasḳhir hoti hai mohabbat men
zafar-yabi magar harf-e-jali lagti nahin mujh ko
kisi shai ki kami lagti hai in afsurda rahon men
usi ka shahr lekin vo gali lagti nahin mujh ko
ḳhizan-baḳhti men kab shaḳh-e-chaman par phuul khilte hain
hansi ahbab ki zinda-dili lagti nahin mujh ko
ba-zahir bagh-o-bazar-o-makan sab lahlahate hain
ye hariyali magar phuli-phali lagti nahin mujh ko
kisi ab-e-ravan par ḳhubsurat naav kaghaz ki
vahi duniya hai lekin kyuun bhali lagti nahin mujh ko
mulamma.a-kariyan ashiya men bhi insan men bhi hain
zamin fitrat ke sanche men Dhali lagti nahin mujh ko
qalandar ḳhanqah-o-madrasa men mast hai lekin
ye masti faqr-e-bu-bakar-o-ali lagti nahin mujh ko
Leave a Reply