havas ki aag bujhi dil ki tishnagi hai vahi
sukun-e-jan se tahi meri zindagi hai vahi
dil-e-fasurda men ehsas hi nahin baaqi
jahan-e-kohna men varna shaguftagi hai vahi
jamal aur junun ho chuke zamana-shanas
niyaz-o-naz men kahne ko sadgi hai vahi
koi qusur to sabit na ho saka lekin
jo bad-guman the unhen mujh se barhami hai vahi
vo har qadam ke asar se hai ba-ḳhabar phir bhi
rah-e-hayat men insan ki kaj-ravi hai vahi
Leave a Reply