Siraj Ajmali
jhuka ke sar ko chalna jis jagah ka qa.eda tha
mire sar ki bulandi se vahan mahshar bapa tha
qusur-e-be-ḳhudi men jis ko suuli di ga.i hai
hamare hi qabile ka vo tanha sar-phira tha
use jis shab madhur avaz men gaana tha lazim
rivayat hai ki us shab bhi parinda chup raha tha
farishte dam-ba-ḳhud ḳha.if sarasima faza thi
Hujum-e-gumrahan tha aur ḳhuda ka samna tha
musafir jis ke rukne ki tavaqqo thi zyada
na jaane kyuun bahut jaldi safar par chal diya tha
Leave a Reply