jis din talak asar miri ah-o-fughan men tha
batlao kaun chain se soya jahan men tha
rakhte the ham baghal men dil-e-garm vo ki bas
paḌ jaata jis ke naam se chhala zaban men tha
ashiq ka kahiyo pahle hi vaan kaam ho gaya
tera hunuz tiir pari-ru kaman men tha
ai barq jis ki laakh jahannum the jeb men
ek ik sharar vo nala-e-atish-fishan men tha
lakhon ke dil ko baton hi baton men le gaya
afsun kahun ki sehr kahun kya bayan men tha
aaya tha kaun sair ko sach kahiyo andalib
jo shor al-aman ka paḌa gulsitan men tha
kya pas-e-ishq hai ki muue par bhi raz-e-ishq
sar-basta vuun hi har qalam-e-ustuḳhvan men tha
vo garm-e-sarf-e-naz the vaan bazm-e-ghair men
sargarm us taraf mira dil sarf-e-jan men tha
chume the kis ke honT ki jo marte dam maza
talḳhi ke badle qand ka mere dahan men tha
kuchh kya chuka nasim-e-sahar barg-e-gul pe kal
jhagḌa jo andalib men aur baghban men tha
haan vaqa.i hai tum to na the bazm-e-ghair men
afsun mujhi ko paḌh ke diya barg-e-pan men tha
bulbul ko baagh men jo taḌapne diya bhala
juz ḳhaar us ke aur bhi kuchh ashiyan men tha
vo na-tavan tha dil-e-ashiq ki jis ka aah
naala kabhi zamin o kabhi asman men tha
shab ḳhvab men mo.amla us mah-jabin se ‘aish’
vo paT gaya jo apne na vahm-o-guman men tha
Leave a Reply