Ezaz Afzal
lahu ne kya tire ḳhanjar ko dilkashi di hai
ki ham ne zaḳhm bhi khaa.e hain daad bhi di hai
libas chhin liya hai barahnagi di hai
magar mazaq to dekho ki aankh bhi di hai
hamari baat pe kis ko yaqin aa.ega
ḳhizan men ham ne basharat bahar ki di hai
dhara hi kya tha tire shahr-e-be-zamir ke paas
mire shu.ur ne ḳhairat-e-agahi di hai
hayat tujh ko ḳhuda aur sar-buland kare
tiri baqa ke liye ham ne zindagi di hai
kahan thi pahle ye bazar-e-sang ki raunaq
sar-e-shikasta ne kaisi hamahami di hai
charagh huun miri kirnon ka qarz hai sab par
ba-qadr-e-zarf nazar sab ko raushni di hai
chali na phir kisi mazlum ke gale pe chhuri
hamari maut ne kitnon ko zindagi di hai
tire nisab men daḳhil thi astan-bosi
mire zamir ne ta.alim-e-sarkashi di hai
kaTegi umr safar jada-e-afrini men
tiri talash ne taufiq-e-gumrahi di hai
hazar dida-tasavvur hazar rang-e-nazar
havas ne husn ko bisyar chehragi di hai
Leave a Reply