dil se na vahi aur hain ‘manzar’ na hamin aur
ye vaqt hai jo ham hain kahin aur vo kahin aur
hans kar nahin ab ruuTh ke ik baar nahin aur
ghussa karo ghussa karo ban jaao hasin aur
sab vahm tha duniya thi falak tha na zamin aur
jab a.ina dekha to nazar aa.e hamin aur hamin aur
mera to salam us ko bahar-e-dar-e-janan
tujh se agar achchhi koi jannat hai kahin aur
iqrar se inkar ke andaz hain dilkash
tum yuun hi kahe jaao nahin aur nahin aur
va.adon men tire ho rahi hai jitni bhi taḳhir
hota chala jaata hai mujhe utna yaqin aur
malik mujhe rusva.i-e-mahshar se bacha le
dena hon jo de le vo saza.en bhi yahin aur
TuuTe na magar silsila-e-daur-e-mohabbat
mujh ko na pilao to piye jaao tumhin aur
ai lucknow ke phulo na ‘manzar’ ko satao
ghabra ke chala jaa.e na be-chara kahin aur
Leave a Reply