Kaisi Hai Aah Apni Tabiat Bhari Hui

kaisi hai aah apni tabiat bhari hui

ankhon men ashk ashk men hasrat bhari hui

atkheliyan na kar tu nasim-e-sahar ki hai

rag rag men un gulon ki nazakat bhari hui

kyuun be-sabab hujum-e-tamanna-o-yas se

hai is dil-e-hazin ki imarat bhari hui

kis ja karega mayyat-e-ushshaq dafn tu

yaan hai shahid-e-naz ki turbat bhari hui

gar jaam tu pilae to piina halal hai

tujh men to saqiya hai malahat bhari hui

kyuun kar gada na tere ghani huun sanam ki hai

dast-e-karam men tere sakhavat bhari hui

ifsha-e-raz-e-ishq na ho khauf hai yahi

chhupti nahin hai aankh mohabbat bhari hui

tum dekh lo ‘jamila’ ki dil gham hua na ho

ankhon men un ke kyuun hai nadamat bhari hui

Leave a Comment