bajte hue ghunghru the uḌti hui tanen thiin
pahle inhi galiyon men naghmon ki dukanen thiin
yuun baiTh rahin dil men shorida tamanna.en
goya kisi jangal men patton ki uḌanen thiin
yarab mire hathon men tesha bhi diya hota
har manzil-e-hasti men jab itni chaTanen thiin
vo lamha-e-larzan bhi dekha hai sar-e-mahfil
ik sho.ale ki muTThi men parvanon ki janen thiin
ham marhala-e-gham men tanha the kahan yaaro
qatil the saliben thiin teghen thi sinanen thiin
ik harf-e-mohabbat yuun phaila ki gunah Thahra
afsane hamare the duniya ki zabanen thiin
Leave a Reply