sitam ke vaar se zanjīr surḳh hone lagī
shikast-e-zīst kī tasvīr surḳh hone lagī
mire badan kā lahū bhī to is meñ shāmil hai
jalā charāġh to tanvīr surḳh hone lagī
koī bhī zaḳhm mire jism par nahīñ lekin
pasīna Tapkā to tahrīr surḳh hone lagī
hamāre baḳht kā sūraj ġhurūb hone se
har ek qaum kī taqdīr surḳh hone lagī
jo ik zamāne se dīvār par hai laTkī huī
na jaane kaise vo shamshīr surḳh hone lagī
har ek aañkh meñ kyā ḳhuuñ agar gayā ‘ātish’
ki muñh se niklī to taqrīb surḳh hone lagī