rah-e-safar men gard kabhi hai kabhi nahin
dil mubtala-e-dard kabhi hai kabhi nahin
hairan kiye hain ḳhalq ko jaadu ki bastiyan
nam-o-nishan-e-fard kabhi hai kabhi nahin
ḳhuun ki safediyon ka nazara hai mustaqil
zor-e-hava-e-sard kabhi hai kabhi nahin
ye kaise hadsat ki surat hai shahar men
chehron ka rang zard kabhi hai kabhi nahin
nilahaTon ko jis ne ghazabnak kar diya
vo sang-e-lajvard kabhi hai kabhi nahin
‘rahat’ vo apni tarz badalta hai barha
lagta mujhe bhi mard kabhi hai kabhi nahin
Leave a Reply