Sufi

Kyun Na Apni Khubi-e-Qismat Pe Itraati Hawa

kyuun na apni khubi-e-qismat pe itrati hava

phuul jaise ik badan ko chhu kar aai thi hava

yuun khayal aata hai us ka yaad aae jis tarah

garmiyon ki dopahar men shaam ki thanDi hava

aur abhi sulgenge ham kamre ke atish-dan men

aur abhi kohsar se utregi barfili hava

ham bhi ik jhonke se lutf-andoz ho lete kabhi

bhule-bhatke is gali men bhi chali aati hava

ek zahrila dhuan bikhra gai charon taraf

sab ko andha kar gai aisi chali andhi hava

us ne likh bheja hai ye pipal ke patte par mujhe

kya tujhe raas aa gai bijli ke pankhe ki hava

kyuun kar ai ‘abid’ bujha paata main apni tishnagi

mujh tak aane hi se pahle ho gaya paani hava

More Poems

Leave a Comment