Poet
idhar bhi dekh zara be-qarar ham bhi hain
tire fida.i tire jan-nisar ham bhi hain
buto haqir na samjho hamen ḳhuda ke liye
gharib banda-e-parvar-digar ham bhi hain
kahan ki tauba ye mauqa hai phuul uḌane ka
chaman hai abr hai saaqi hai yaar ham bhi hain
misal-e-ghuncha udhar ḳhanda-zan hai vo gul-e-tar
misal-e-abr idhar ashk-bar ham bhi hain
jigar ne dil se kaha dard-e-hijr-e-janan men
ki ek tu hi nahin be-qarar ham bhi hain
mudam samne ghairon ke be-naqab rahe
isi pe kahte ho tum parda-dar ham bhi hain
hamen bhi dijiye apni gali men thoḌi jagah
gharib balki gharib-ud-dayar ham bhi hain
shagufta bagh-e-suḳhan hai hamin se ai ‘sabir’
jahan men misl-e-nasim-e-bahar ham bhi hain
Leave a Reply