tera firaq arsa-e-mehshar laga mujhe
jab bhi ḳhayal aaya baḌa Dar laga mujhe
jab bhi kiya irada-e-tark-e-ta.alluqat
kya jaane kyon vo shoḳh hasin-tar laga mujhe
parkha to zulmaton ke siva aur kuchh na tha
dekha to ek nuur ka paikar laga mujhe
ḳhud apni zaat par bhi na rah jaa.e e’tibar
ai vaqt ho sake to vo nashtar laga mujhe
kya jaane kis jahan men baste hain narm-dil
main ne jise chhua vahi patthar laga mujhe
ik martaba zarur nazar phir se uTh ga.i
jo qad bhi tere qad ke barabar laga mujhe
qismat isi ko kahte hain phulon ki sej par
leTa jo main to kanTon ka bistar laga mujhe
us phuul ka kaleja mila gham se paash paash
jo phuul dekhne men gul-e-tar laga mujhe
dil hans ke jhel jaa.e ye baat aur hai magar
charka tiri nigah ka aksar laga mujhe
duniya ka ye nizam ye me.ar-e-sim-o-zar
kamtar laga mujhe kabhi bad-tar laga mujhe
un ki gali ki baat hi ‘qadir’ ajiib hai
har shaḳhs sher-fahm-o-suḳhnavar laga mujhe
Leave a Reply