Ahmad Rahi
ab to shayad isi andaz se jiina hoga
us ke har zulm ko be-dad ko chup-chap sahen
yuun to kahne ko bahut kuchh hai magar athon pahar
ik yahi fikr hai kis tarah kahen kis se kahen
dekhti ankhon se ham se to ye hoga na kabhi
is bhari bazm men ham surat-e-tasvir rahen
baat kahne ka jo anjam hua karta hai
ashkara hai kisi se bhi to mastur nahin
vo jo aqaon ke dastur ko thukra ke badhen
vadi-e-dar-o-rasan un se koi duur nahin
ham bhi shayad usi manzil men pahunch kar dam len
dahr men ghalba-e-zulmat hamen manzur nahin
qaid kya shai hai salasil ki haqiqat kya hai
jism paband sahi fikr to mahsur nahin
dil men jo baat khatakti ho agar dil men rahe
maslahat-keshi hai ye sheva-e-mansur nahin
Leave a Reply