Itna Malum Hai!

apne bistar pe bahut der se main nim-daraz

sochti thi ki vo is vaqt kahan par hoga

main yahan huun magar us kucha-e-rang-o-bu men

roz ki tarah se vo aaj bhi aaya hoga

aur jab us ne vahan mujh ko na paaya hoga!?

aap ko ilm hai vo aaj nahin aai hain?

meri har dost se us ne yahi puchha hoga

kyuun nahin aai vo kya baat hui hai akhir

khud se is baat pe sau baar vo uljha hoga

kal vo aaegi to main us se nahin bolunga

aap hi aap kai baar vo rutha hoga

vo nahin hai to bulandi ka safar kitna kathin

sidhiyan chadhte hue us ne ye socha hoga

rahdari men hare lawn men phulon ke qarib

us ne har samt mujhe aan ke DhunDa hoga

naam bhule se jo mera kahin aaya hoga

ghair-mahsus tariqe se vo chaunka hoga

ek jumle ko kai baar sunaya hoga

baat karte hue sau baar vo bhula hoga

ye jo ladki nai aai hai kahin vo to nahin

us ne har chehra yahi soch ke dekha hoga

jan-e-mahfil hai magar aaj faqat mere baghair

haae kis darja vahi bazm men tanha hoga

kabhi sannaton se vahshat jo hui hogi use

us ne be-sakhta phir mujh ko pukara hoga

chalte chalte koi manus si aahat pa kar

doston ko bhi kis uzr se roka hoga

yaad kar ke mujhe nam ho gai hongi palken

”ankh men pad gaya kuchh” kah ke ye taala hoga

aur ghabra ke kitabon men jo li hogi panah

har satar men mira chehra ubhar aaya hoga

jab mili hogi use meri alalat ki khabar

us ne ahista se divar ko thama hoga

soch kar ye ki bahal jaae pareshani-e-dil

yunhi be-vajh kisi shakhs ko roka hoga!

ittifaqan mujhe us shaam miri dost mili

main ne puchha ki suno aae the vo? kaise the?

mujh ko puchha tha mujhe DhunDa tha charon janib?

us ne ik lamhe ko dekha mujhe aur phir hans di

is hansi men to vo talkhi thi ki is se aage

kya kaha us ne mujhe yaad nahin hai lekin

itna maalum hai khvabon ka bharam tuut gaya!

Leave a Comment