ahmad-nadeem-qasmi

Ek Mohabbat Ke Ewaz Arz-O-Sama De Dunga

ik mohabbat ke evaz arz-o-sama de dunga

tujh se kafir ko to main apna khuda de dunga

justuju bhi mira fan hai mire bichhde hue dost

jo bhi dar band mila us pe sada de dunga

ek pal bhi tire pahlu men jo mil jaae to main

apne ashkon se use ab-e-baqa de dunga

rukh badal dunga saba ka tire kuche ki taraf

aur tufan ko apna hi pata de dunga

jab bhi aaen mire hathon men ruton ki bagen

barf ko dhuup to sahra ko ghata de dunga

tu karam kar nahin sakta to sitam tod ke dekh

main tire zulm ko bhi husn-e-ada de dunga

khatm gar ho na saki uzr-tarashi teri

ik sadi tak tujhe jiine ki dua de dunga

More Poems

Leave a Comment