Duniya Ne Bas Thaka Hi Diya Kaam Kam Hue

Wali Alam Shaheen

duniya ne bas thaka hi diya kaam kam hue

teri gali men aa.e to kuchh taza-dam hue

uqda khula to dard ke rishte baham hue

daman ke saath ab ke gareban bhi nam hue

jab se asir-e-silsila-e-besh-o-kam hue

ham ko salib apne hi naqsh-e-qadam hue

badli zara jo tarz-e-ḳhiram-e-sitargan

nuqton men aankh biich sahife raqam hue

the muntazir hamare bhi gul-chehragan-e-shahr

lekin riha giraft-e-jahan se na ham hue

rah kar jin intihaon men apni guzar ga.i

is tarah jiine vaale to jan-bar hi kam hue

divar par gaḌe hue TukḌe pe kanch ke

ye kis hisar-e-rang men mahsur ham hue

chashmak ye dhuup chhanv ki aur ek zard phuul

ik jan-e-na-tavan pe hazaron sitam hue

yakta o be-nazir hai vo kya use gharaz

ḳharij hue ki daḳhil-e-kaba sanam hue

‘shahin’ the kamal ke rutba-shanas-e-dahr

par apni manzilat se ḳhud agah kam hue