Qaus-E-Quzah

thi shaam qarib aur dahqan

maidan men tha galle ka nigahban

dekhi us ne kaman nagah

jo karti hai menh se ham ko agah

rangat men use ajiib paaya

zahir men bahut qarib paaya

pahle se vo sun chuka tha akasr

hai qaus men ik piyala-e-zar

mashhur bahut hai ye kahani

afsana-tarash ki zabani

milti hai jahan kaman zamin se

milta hai vo jam-e-zar vahin se

socha lo jaam aur banu jam

chhodo buzu go safand ka gham

behuda ganvar is guman par

sidha gaya tiir sa kaman par

din ghatne laga qadam badhaya

ummid ki ab khazana paaya

jitni koshish ziyada-tar ki

utni hi kaman pare ko sarki

pinhan hui qaus akhir-e-kar

aur zulmat-e-shab hui numudar

nakam phir vo saada dahqan

hasrat-zada gham-zada pasheman

Leave a Comment