kanTe hi kanTe hain ta-hadd-e-nazar
phir bhi taaza hai mira azm-e-safar
rahzanon ki rahnuma.i dekh kar
aaj tharrati hai ik ik rahguzar
Dho rahe ho kis liye patthar ka bojh
ho ga.e mismar sab shishe ke ghar
chaliye viranon men basne ke liye
shahr to barbadiyon ke hain khanDar
aa ga.i sub.h-e-tarab to kya hua
suuna suuna hai mire dil ka nagar
jin se hota hai farogh-e-azari
aah vo kis kaam ke ilm-o-hunar
kamrani paanv chumegi ‘kamal’
dekhiye ghairon ka daman chhoḌ kar
Leave a Reply