kitni hi be-zarar sahi teri ḳharabiyan
‘basir’ ḳharabiyan to hain phir bhi ḳharabiyan
halat jagah badalne se badli nahin miri
hoti hain har jagah ki kuchh apni ḳharabiyan
tu chahta hai apni na.i ḳhubiyon ki daad
mujh ko aziiz teri purani ḳharabiyan
junhi ta.alluqat kisi se hue ḳharab
saare jahan ki us men milengi ḳharabiyan
sarkar ka hai apna hi me.ar-e-intiḳhab
yaaro kahan ki ḳhubiyan kaisi ḳharabiyan
aadam ḳhata ka putla hai gar maan len ye baat
niklengi is ḳharabi se kitni ḳharabiyan
un hastiyon ki raah pe dekhenge chal ke ham
jin men na thiin kisi bhi tarah ki ḳharabiyan
bo.enge apne baagh men sab ḳhubiyon ke biij
jaḌ se ukhaḌ phenkenge saari ḳharabiyan
‘basir’ kei shaḳhsiyat bhi ajab hai ki is men hain
kuchh ḳhubiyan ḳharab kuchh achchhi ḳharabiyan
Leave a Reply