lahje ki udasi kam hogi baton men khanak aa ja.egi
do-roz hamare saath raho chehre pe chamak aa ja.egi
ye chand-sitaron ki mahfil ma.alum nahin kab raushan ho
tum paas raho tum saath raho jazbon men kasak aa ja.egi
kuchh der men badal barsenge kuchh der men savan jumenge
tum zulf yuun hi lahra.e raho mausam men sanak aa ja.egi
jab us ki malahat ke qisse likkhunga ghazal ke sheron men
har rukhe-phike misre men tasir-e-namak aa ja.egi
suraj ko zara kuchh Dhalne do kuchh vaqt ka dariya bahne do
jo dhuup abhi tak sar par hai vo paanv talak aa ja.egi
ye soch ke tere qadmon ki kuchh ḳhaak uḌa di gulshan men
har phuul men tere chehre ki thoḌi si jhalak aa ja.egi
jis baat ka matlab ḳhushbu hai har gaanv ke kachche raste par
us baat ka matlab badlega jab pakki saḌak aa ja.egi
ye pyaar ka din hai pyaar ka din iqrar karo ‘anjum’-sahab
is din ki zara si qadr karo jivan men mahak aa ja.egi
Leave a Reply