Dil Ne Rone Ka Ehtimam Kiya

Neelma Naheed Durrani

dil ne rone ka ehtimam kiya

meri ankhon se yuun kalam kiya

dukh bhi chehre pe oḌh kar rakkha

tere gham ko bhi aise aam kiya

ashk utra to ḳhuun jamne laga

tan badan ko yuun niil faam kiya

ham kabhi niind bhar na so paa.e

raat jaage to din men kaam kiya

phuul ḳhush-rang the sabhi lekin

ham ko ik ḳhaar ne ghulam kiya

sarv-qamat bhi sajda rez hue

vaqt andhi ne aisa kaam kiya