Hum Hain Ai Yar Chadhae Hue Paimana-E-Ishq

ham hain ai yaar chadhae hue paimana-e-ishq

tire matvale hain mashhur hain mastana-e-ishq

dushmanon men bhi raha rabt-e-mohabbat barson

khush na aaya kasi maashuq ko yarana-e-ishq

mujh ko jo chaah mohabbat ki hai majnun ko kahan

us ko laila hi ka sauda hai main divana-e-ishq

jaan lenge ki vo dil lenge jinhen chaha hai

dekhiye karte hain kya aa ke vo jurmana-e-ishq

ja-ba-ja chahne valon ka jo majmaa dekha

kucha-e-yar ko samjha main jilau-khana-e-ishq

sal-ha-sal se khush-bash jo huun sahra men

alam-e-hu ko samajhta huun main virana-e-ishq

dil pisa chahta hai ja ke hina par us ki

khirman-e-husn hua chahta hai dana-e-ishq

dil ka hai qasd tiri bazm men ad kar ja.un

kya hi be-par ki udata hai ye parvana-e-ishq

har pari-zad ki hai jalva-numa ik tasvir

shisha-e-dil hai hamara ki pari-khana-e-ishq

dil mira khaas makan hai jo tiri ulfat ka

kahti hai saari khudai ise kashana-e-ishq

kaun kis ka shab-e-mearaj men hoga maashuq

ki hai kis shokh ne ye mahfil-e-shahana-e-ishq

tu kare naaz tujhe yaar zamana chahe

ta-abad ye rahe abad tira khana-e-ishq

us pari-ru ne jo dekha mire dil ko sad-chak

apni zulfon men kiya nam-e-hava shana-e-ishq

alam-e-nur tiri shakl ka parvana hai

husn ki jaan hai tu aur hai janana-e-ishq

sar-ba-kaf ganj-e-shahidan men chale jaate hain

imtihan se nahin Darte tire farzana-e-ishq

nazaa men sura-e-yusuf koi lillah padhe

dam bhi nikle to marun sun ke main afsana-e-ishq

DabDabain miri ankhen to vo kya kahte hain

dekho labrez hain chhalkenge ye paimana-e-ishq

ai ‘sharaf’ kaun mire dil ke muqabil hoga

ik yahi saari khudai men hai mardana-e-ishq

Leave a Comment