Rumana Rumi
apni dida-vari se darti huun
varna main kab kisi se darti huun
asl se naqal badh na jaae kahin
fan-e-surat-gari se darti huun
mujh ko itna khuda ka khauf nahin
jitna main aadmi se darti huun
dosti ki to baat hi na karo
main bahut dosti se darti huun
tirgi to miri muhafiz hai
ham-nafas raushni se darti huun
jis ko insaniyat se pyaar na ho
aise har aadmi se darti huun
duub jaun na main khudi men kahin
is liye is khudi se darti huun
khud kahin dil kahin dimagh kahin
main tiri bandagi se darti huun
maslahat se jo kaam lete hain
un ki kam-himmati se darti huun
le na duube tujhe ye ai ‘rumi’
main tiri khud-sari se darti huun
Leave a Reply