vaaiz ke paas jaenge ham mai piye hue
muddat hui hai tauba se tauba kiye hue
mashq-e-khiram gor-e-ghariban men kya zarur
mahshar bapa karenge ye murde jiye hue
khamosh kyuun hain shahr-e-khamoshan ki sakenin
goya dahan hain tar-e-nafas se siye hue
na-azmuda-kari-e-husn un ki hai ghazab
sharmae phirte hain vo mira dil liye hue
ye didani hai mai-kada men josh-e-be-khudi
aae hain aaj hazrat-e-vaiz piye hue